Һаяхана Улаан-Үдэдэ, Үндэһэтэнэй номой санда сагаан һарада зорюулагдаһан литературна-хүгжэм дуута үдэшэ болобо. Энэ уулзалгые  Россиин габьяата зүжэгшэн, уран шүлэгшэн Чингис Гуруев хүтэлжэ, эгээл түрүүн сугларагшадые һайндэрээр амаршалба. Энэ үдэшын илгаа  гэбэл, тусхай айлшан болохо Дугарма Батаболотовае сугларһан зон онсо тэмдэглэбэ. Сагаалганай урдахана Агын уран шүлэгшэд Дугарма Батаболотова, Сэсэг Дамбаева хоёр Буряадай уран зохёолшодой холбооной гэшүүндэ абтаһан байна. Дугарма Батаболотова Сагаан-Уула нютагһаа гарбалтай, олон жэлэй туршада Сахюурта нютагта багшалаа. Залууһаа хойшо шүлэг бэшэжэ туршадаг, «Толон», Буряад үнэн», «Байгал» гэхэ мэтэ һонин сэтгүүлнүүдтэ шүлэгүүдынь толилогдодог байгаа юм. 2010 ондо Шэтэдэ Борис Макаровай оршуулгаар «Не хочу судьбы иной» гэжэ согсолбори ород хэлэн дээрэ гараа. 2012 ондо Агада «Хуби заяанай модон» гэжэ ном хэблэгдээ.  

Буряад Республикын уран зохёолшодой холбооной түрүүлэгшэ Матвей Чойбонов, Дулгар Доржиева, Тимур Гомбожапов, Буряад Республикада Агын тойрогой түлѳѳлэлгын хүтэлбэрилэгшын орлогшо, шүлэгшэн Цыбигмит Дамдинжапова Сагаан һарын һайндэрээр сугларагшадые амаршалан, хүндэтэ айлшандаа  шүлэгүүдые зорюулба. Буряадай арадай поэт Булад Жанчипов, ахамад зохёолшон Д.О.Эрдынеев Ага нютагай бэлигтэй шүлэгшэндэ дулаахан үгэнүүдые зорюулба. Буряадай оперын дуушад  Валентина Цыдыпова, Бэлигма Ринчинова, Батор Цыпылов аялгата һайхан буряад дуунуудые хангюурдаба.

Нютагайнгаа басаганай баярые хубаалдахаяа Сагаан Уула нютагай түлѳѳлэгшэд – Улаан-Үдэдэшье байдаг зон, Агаһаашье ерэһэн нүхэдынь  амаршалгын сэсэг барюулба, үгэ хэлэбэ, дуу дуулалдаба.

Дугармаа Батаболотовагай шүлэгүүд тухай бага зэргэ мэдэжэ абахын тэдыгээр «Хуби заяанай модон» согсолбориһоо  иимэ мүрнүүдые буулгая:

ХОЮУЛАА
Хада ханамни хадаа,
Ханилhан нүхэрни хадаа,
Хүүгэдэймни эсэгэ хадаа,
Эльбыш даа намаяа,
Энхэрыш даа намаяа,
Эрхэлүүлыш даа намаяа.
        Угайшни гуламтые
        Унтараангуй бадарааhан,
        Эхэнэр хүн ха юмбиб даа бишни!