«МИНИИ БУРЯАД»

Иимэ нэрэтэй шэнэ сэтгүүл Буряадта мүндэлбэ. Түрүүшын дугаар нара хаража, уншагшадта тараагдажа эхилбэ.

Юрэ бодоходо, елэгэр хатуу саарһатай, үнгэтэ зурагуудаар шэмэглэгдэһэн, буряад хэлээр бэшэгтэй иимэшүү хэблэл ерээд онуудһаа хүлеэгдэдэг байгаа юм. Ашаг олзогүй, мүнгэ хэзээдэшье асархагүй проектһээ хүн зүрхэ алдадаг юм гү, али заатагүй олон хүндэ уншуулха дуратай байһан юм гү, бү мэдэе. Үдэр бүри хубилжа байгаа оршон сагай буряад соёлой, хэлэнэй муу һайн байдал хараад шиидэжэшье болоо юм бэзэ. Ушар тиимэһээ арад олондо туһатай энэ хэрэгтэ зүрхѳѳ даран хам ороһон «Ариг ус» телекомпаниин ажалтанай урда доро дохихоор байна. Шэнэ сэтгүүлые үүсхэн байгуулагша, хэблэгшэ  --  хизаарта харюусалгатай бүлгэм «Алтаргана». Ахамад редактор Норжима Цыбикова, ахамад редакторай орлогшо Даши-Доржо Болотов. Уран зурааша, дизайнер Бальжинима Доржиев, макет хэдэг дизайнер Аркадий Батомункуев болон бусад Улаан-Үдэһѳѳ, Үбэр Монголһоо, Монгол уласһаа, Агаһаа хэдэн автор, фотографууд хэшээн оролдожо, түрүүшын номер бүтээбэ. Тиражынь – 3000 хэһэг.

Буряадби гэжэ ѳѳрыгѳѳ нэрлэдэг хүн бүхэнэй эхэ ороншо сэдьхэл соо   түрэл тоонто нютагай дүрсэ зурагууд далдахан хадагалаатай байдаг. Хэзээ нэгэтэ тэрэнь гаража ерэдэг. Энэ дэлхэйн  ондоо орон нютагуудта буряадууд  баһа Буряад орон тухай бодол дурсалгаяа бѳѳмэйлжэ ябадаг гээшэ. Тэдэ бултанай һонорто шэнэ сэтгүүл хандана.  «Энэ журнал гаргахадаа энэ тэрэ уряа лозунг соносхохо, ухаа зааха, хүмүүжүүлхэеэ һананагүйбди. Байһан шадал соогоо хабаатай ушар, һонин мэдээсэл, хүнүүд, фото зураг – эдэ бүгэдые бэдэржэ, манай хамтын соёл түүхэдэ шэнэ хуудаһа оруулха хүсэлтэйбди. Манай оролдолго хэшээл хамтын аша туһаар лэ бүтэхэ жэшээтэй» гэжэ ахамад редактор Н. Д. Цыбикова оршол үгэ соогоо бэшэнэ. Бүтэхэнь болтогой!     

Шэнэ журналай бии болоһон ушараар Буряадай оперо баледэй театрай ордон соо баярай наада тоглоон болобо. Үдэшые "Ариг Ус" телекомпаниин "Мүнгэн сэргэ" дамжуулга хүтэлдэг Дашадоржо Болотов, БГТРК-гай Гүнсэма Тудупова, Монгол Уласай телевидениин 2-дохи каналай диктор Арюунзула, Шэнэхээн нютагай багша Дашадондог гэгшэд хүтэлбэ. Намгар Лхасаранова, Бадма-Ханда Аюшеева, Саян Цымпилов, Хажидма Аюржанаева, Бэлигма Ринчинова, Чингис Раднаев, Виктор Жалсанов  - Оросые, Жаргалсайханай Чингис, Пүрбэжамсын Бадрал – Монгол уласые,  Согтын Должон, Балдандоржийн Балжан, Дугарнимын Долгорма, эхир басагад Цэрэн-Нимын Цэндэ, Сэлһаа – Хитад уласай Шэнэхээн нютагые түлѳѳлбэд. Ёһотой эб хамтын, һаналаа нэгэдэлгын баярта үйлэ болобо.

Раднанима Базаровай концертын үедэ буулгаһан  фото зурагууд дээрэ: 1) журналай түрүүшын номерой дүрсэ, 2) Намгар Лхасаранова, 3) Бадмаханда Аюшеева, 4) Жаргалсайханай Чингис, 5) Жаргалсайханай Чингис ба Чингис Раднаев