Ажаһуугшад гэжэ үгэ тухай

Ажаһуугшад 

Анхан  жители гэжэ ород үгэһѳѳ хуулан оршуулһан, онобшогүйшэг энэ үгэ үргэн олоной хэлэндэ үшѳѳл һуурияа олоогүй хэбэртэй. Гол түлэб сэдхүүлшэд лэ хэрэглэдэг. Ушар тиимэһээ тэрэ үгын хажуугаар зон, хүн зон, улад зон  гэхэ мэтээр хэлэхэдэ яаха юм?

Хэнэй хараха наадан юм?

  

Олимпиадын путевко һонирхобоб.

Һара үдэр: 17.02 - 20.02 (4 үдэр/3 һүни).

Байха газар: «Южный-2» отель, 4* мүшэтэ. Үдэрэй нэгэ завтрак сэндэнь ороно. Зай, эдеэлхэеэ тиишэ ошохомнай һэн гү?

Путевкын сэндэ оруулагдаһан мүрысѳѳнүүд: февралиин 18 ба 19-да — подгруппада илагшадые тодоруулха (оройдоол) наадануудые хараха, үдэр соо гурбан наадан. Соёлой программа байхагүй. 20-ной үдэшэ номероо сүлѳѳлхэ ёһотойб. Ябаа Цыренкэ, гэрээ мартажа орхибош хари…

Дүн хамта хэды гэжэ һананабта. Этигэжэ ядаад, нюдѳѳ аршабалби:   

 нэгэ хүндэ — 358 236 түхэриг, хоёр хүндэ — 622 616 түхэриг.

P.S.Сочи хүрэтэр, һѳѳргѳѳ билет энэ сэндэ ороногүй.

Гуша гаран жэлэй саана Москвагай Олимпиадада дэлхэйн олон рекорд сохихые хараа бэлэйб. Мүнѳѳ манай орондо дахяад Олимпиада болоо хадань ошохо хүм бэзэб гэжэ һанагдаа. Тиигэнхаар Бразилида дэлхэйн мундиаль (футбол) хараа һаа дээрэ ха. Лаб энээнһээ үнэгүй байха. Байза, хаанаһаа мүнгэ олохо гээшэб?

Байгалай турпутевко    

    

Улаан-Үдын аяншалгын нэгэ фирмэ Таиланд ошожо амархые дурадхана.  Самоледоор ниидэжэ ошоод, 10 хоног Паттайяда амараад, һѳѳргѳѳ Улаан-Үдэеэ ниидэжэ ерэхэдэш, дүн хамта 11 мянган түхэриг.   

        Харин Байгал дээрэ Энхэлэг һууринда «4 сезона» турбазада хоёр һууритай нэгэ номерто нэгэ хонохын түлѳѳ 6000 түхэриг түлэхэ ёһотой. Хүнэй хомхой барагдахагүй ха даа.  

       Эрхүүгэй Листвянкада адли, Энхэлэгтэ ямаршье эхи тархигүй барилга хэнэ. Томо гэгшын ордонгууд захаһаа бодоно. Газаагаа модон жорлонтой, нобшо ноохойгоош хаяхагүй аад, мүнгэн лэ һанаандань байха. Ямар аяншалагшад, ямар туризм гэжэ шууялдагшаб? Болиё даа.